O'zbekistonlik talaba Buyuk Britaniyada o'tkazilgan taekvondo bo'yicha xalqaro turnirda oltin medalni qo'lga kiritdi

O'zbekistonlik sportchi Shohruz Xudoyberdiyev Britaniya universiteti Taekvondo ligasida (British University Taekwon-Do League – BUTL) oltin medalni qo'lga kiritdi, deb xabar qilmoqda "Dunyo" AA muxbiri.

London shahrida tashkil etilgan chempionatda 54 davlatdan kelgan talaba sportchilar ishtirok etdi. O'zbekiston vakili taekvondo WTF yo'nalishida 63 kg vazn toifasidagi bahslarda o'z kuchini sinovdan o'tkazdi.

Shohruz Xudoyberdiyev Britaniyaning Vestminster universitetida Moliya va biznes boshqaruvi yo'nalishida tahsil olmoqda. Bir vaqtning o'zida u taekvondo bilan professional tarzda shug'ullanadi.

Britaniya universiteti Taekvondo ligasi talabalar o'rtasida yuqori darajadagi turnirlarni tashkil etish va mashg'ulotlar bilan professional tarzda shug'ullanishlari uchun imkoniyatlar yaratish maqsadida ta'sis etilgan. BUTL, shuningdek, barcha sportchilarga taekvondoning ITF va WTF yo'nalishlarida chuqurlashtirilgan mashg'ulotlar dasturlarni ham ishlab chiqadi.

Tashkilot 2015-yilda Ross Sharman tomonidan tashkil etilgan.