O'zbekiston mutaxassislari va kompaniyalari Londondagi "yashil" iqtisodiyotga bag'ishlangan xalqaro tadbirlarda ishtirok etadi

LONDON, 2-avgust. /"Dunyo" AA/. O'zbekiston elchisi Ravshan Usmanov Britaniyaning "Innovation Zero" kompaniyasi savdo masalalari bo'yicha katta maslahatchisi Patrik Uebb bilan uchrashuv o'tkazdi, deb xabar bermoqda "Dunyo" AA muxbiri.

Patrik Uebb "Innovation Zero" kompaniyasi faoliyati haqida, shuningdek, shu yil 30-aprel – 1-may kunlari bo'lib o'tgan ko'rgazma va panel sessiyalar, past uglerodli iqtisodiyot va jamiyatni shakllantirish bo'yicha ishlar, "Net Zero"ga erishishda barqaror yechimlarni ilgari surish va amalga oshirishni jadallashtirish masalalari, "yashil" energiyaga o'tishning muhim jarayonlari to'g'risida batafsil ma'lumot berdi.

Tomonlar "Innovation Zero"ning 2025-yil 29-30-aprel kunlari Londonda bo'lib o'tadigan tadbirlarda O'zbekiston mutaxassislari va yirik kompaniyalari ishtirokini ishlab chiqish masalalarini muhokama qildilar.

"Innovation Zero" kompaniyasi past uglerodli iqtisodiyot va jamiyatni yaratish maqsadida ta'sis etilgan. Kompaniya mazkur yo'nalishlarda xalqaro tadbir va ko'rgazmalarni o'tkazib keladi. Uning aksariyat yirik ko'rgazmalari Londonda yilda bir marotaba tashkil etiladi.