Londonda O'zbekiston Madaniyat va san'atni rivojlantirish jamg'armasi tomonidan tantanali konsert dasturi tashkil etildi

LONDON, 15-sentabr. /"Dunyo" AA/. Londondagi muhtasham Kolizey teatr va madaniyat saroyida taniqli bastakor va pianinochi Kirill Rixterning "Vaqt qumlari" multimedia tomoshasining Britaniyadagi premyerasi bo'lib o'tdi, deb xabar qilmoqda "Dunyo" AA muxbiri.

O'zbekiston Madaniyat va san'atni rivojlantirish jamg'armasi ko'magida tashkil etilgan ushbu betakror tadbir musiqa, she'riyat, vizual va video qurilmalarni o'zida jamlab, butun maydonni jonli, doimo o'zgarib turadigan san'at asariga aylantirdi.

Unda Kirill Rixter bilan birgalikda uning "Rixter Trio" ansambli va Alibek Kabdurahmanov boshchiligidagi O'zbekiston milliy simfonik orkestri o'z dasturini taqdim etdi.

Dastur davomida Kirill Rixterning tanlangan asarlari, jumladan, uning "Chronos" debyut albomidan parchalar, shuningdek, FIFA Jahon chempionati va Olimpiya o'yinlari uchun yozilgan madhiyalar ijro etildi.

Tadbirda Buyuk Britaniya parlamenti, hukumati, ilmiy-akademik, ekspert-tahlil, biznes doiralari, diplomatik korpus rahbarlari va ushbu mamlakatda istiqomat qilayotgan vatandoshlar ishtirok etdi.

Konsert dasturi ishtirokchilarga katta taassurot qoldirdi.