O'zbekiston va Buyuk Britaniya maxsus vakillari Afg'oniston bo'yicha ikki tomonlama hamkorlik istiqbollarini muhokama qildilar

Kecha O'zbekiston Prezidentining Afg'oniston bo'yicha maxsus vakili Ismatulla Irgashev va Buyuk Britaniya Bosh vazirining Afg'oniston va Pokiston bo'yicha maxsus vakili Endryu Makkubri o'rtasida videokonferensaloqa shaklida muzokaralar bo'lib o'tdi, deb xabar bermoqda "Dunyo" AA muxbiri.

TIV ma'lumotiga ko'ra, tomonlar Afg'oniston bo'yicha O'zbekiston - Buyuk Britaniya hamkorligining bugungi holatini muhokama qildilar. Bu yo'nalishda muntazam muloqotni davom ettirishdan o'zaro manfaatdorlik ta'kidlandi.

Uchrashuvda joriy yilning fevral oyida BMT bosh kotibi Antoniu Guterrish raisligida Qatar poytaxti Doha shahrida bo'lib o'tadigan Afg'oniston bo'yicha maxsus vakillarning uchrashuviga alohida e'tibor qaratildi.

Ushbu tadbir jahon hamjamiyatining Afg'onistondagi vaziyatni barqarorlashtirish bo'yicha samarali yechimlarni topish bo'yicha harakatlarini muvofiqlashtirish, afg'on xalqiga insonparvarlik yordami ko'rsatishda muhim ahamiyat kasb etishi ta'kidlandi.

Anvar Ilyosov olgan surat ("Dunyo" AA)