Xalqaro tadqiqot nimani ko‘rsatadi: xavfsizlik turizm jozibadorligining muhim omili sifatida

Bugungi kunda sayohat yo‘nalishini tanlashda shaxsiy xavfsizlik hissi tobora muhim omillardan biriga aylanmoqda. Aynan shu mezon Safety Perceptions Index 2023 xalqaro tadqiqoti asosini tashkil etadi. Tadqiqot Institute for Economics & Peace (Vision of Humanity) tahliliy markazi tomonidan tayyorlangan.

Mazkur tadqiqot natijalariga ko‘ra, O‘zbekiston shaxsiy xavfsizlikni his etish darajasi bo‘yicha 121 mamlakat orasida birinchi o‘rinni egalladi. Indeks jinoyatchilik statistikasi emas, balki odamlarning kundalik hayotda o‘zini qanchalik xavfsiz his qilishi ko‘rsatkichini baholaydi hamda World Risk Poll xalqaro so‘rovi ma’lumotlariga asoslanadi.

So‘nggi yillarda xavfsizlik turizm sohasida tobora muhim omilga aylanib bormoqda. Transport qulayligi, xizmatlar sifati va turizm infratuzilmasi bilan bir qatorda, shaxsiy xavfsizlik hissi ham sayohat yo‘nalishiga bo‘lgan ishonchni shakllantirish va tanlov qilishda muhim ahamiyat kasb etadi.

Shu nuqtai nazardan, Safety Perceptions Index natijalari O‘zbekistonning turizm salohiyatiga yana bir jihatdan baho berish imkonini beradi. Boy tarixiy-madaniy meros, rang-barang turistik yo‘nalishlar va zamonaviy infratuzilma bilan birga, xavfsizlikning yuqori darajada qabul qilinishi mamlakatning xalqaro maydondagi ijobiy qiyofasini mustahkamlovchi muhim omillardan biri hisoblanadi.

Madaniy meros, an’anaviy mehmondo‘stlik, turizm sohasida amalga oshirilayotgan islohotlar hamda qulay jamoat muhiti uyg‘unligi O‘zbekistonda sayohat qilish uchun munosib sharoit yaratmoqda. Mamlakat xalqaro turizm yo‘nalishi sifatida o‘z salohiyatini izchil rivojlantirar ekan, nufuzli xalqaro tadqiqotlar uning dunyo hamjamiyati tomonidan qanday qabul qilinayotganini aks ettiruvchi muhim ko‘rsatkichlardan biri bo‘lib xizmat qilmoqda.

Tahliliy hisobot havolasi:

https://www.visionofhumanity.org/wp-content/uploads/2023/02/SPI-2023-2.pdf